Francesca
O Parlamento Europeo dá o primeiro paso para ratificar o CETA
- A comisión de Comercio Internacional da Eurocámara dá luz verde ao acordo de libre comercio con Canadá con 25 votos a prol, 15 en contra e cero abstencións.
- Despois terá que ser ratificado por cada un dos países da UE
EuropaPress Bruxelas
eldiario.es
O Parlamento Europeo deu este martes o primeiro paso para cumprir a ratificación formal do acordo comercial entre a Unión Europea e Canadá (CETA), co voto a favor da comisión de Comercio Internacional da Eurocámara.
A comisión deu así luz verde ao acordo con 25 votos a prol, 15 en contra e cero abstencións. A posición favorable será sometida ao voto da plenaria na súa reunión do 15 de febreiro en Estrasburgo (Francia), segundo anunciou o presidente da comisión europarlamentaria, o socialista alemán Bernd Lange.
A Eurocámara pode aprobar ou rexeitar o pacto comercial, pero non modificar as súas disposicións. No voto, foron rexeitadas tanto as emendas que chamaban a tombar o CETA, como aquelas que avogan por aprazar un ano ou seis meses o consentimento.
O acordo de libre comercio entre a UE e Canadá é un acordo de competencia “mixta” que ao lado europeo comparten a propia UE e os Estados membros, o que implica que para a súa aplicación plena será necesario tamén contar co visto e prace formal de cada un dos países da UE.
Con todo, a Unión Europea espera que, se o acordo recibe luz verde de parte da Eurocámara, a súa posta en marcha “provisional” e parcial sexa posible xa desde o mes de abril, segundo explicaron fontes parlamentarias.
As negociacións entre a UE e Canadá chegaron á súa conclusión en setembro de 2014, pero as partes só lograron asinar o pacto a finais de outubro de 2016 e tras superar un último veto de Bélxica, polas reservas da súa rexión valona.
As dúbidas que expoñen algunhas das súas disposicións máis polémicas, como a legalidade do sistema de arbitraxe entre Estados e multinacionais, e o que fose visto como antesala para o acordo transatlántico entre a UE e Estados Unidos (TTIP) -cuxas conversacións están agora conxeladas- complicou a súa ratificación.
Fonte: http://www.noalttip.org