Resistencia de EU a dar acceso aberto a algunhas exportacións alimentarias de Mercosur, fica sendo un obstáculo central a completar o longamente-atrasado acordo que leva en negociación dende 1995. [Rafael Vianna Croffi / Flickr]
Os negociadores do acordo de libre comercio entre a Unión Europea e o bloque suramericano Mercosur queren asinalo en setembro, pero as diferenzas ao redor da carne de vacún, o azucre e a industria automobilística poderían botar por terra esas esperanzas, afirmou o ministro brasileiro de Asuntos Exteriores, Aloysio Nunes.
As cuestións relativas á propiedade intelectual, as denominacións de orixe e os servizos de transporte marítimo tamén deben ser aclaradas, dixo Nunes nunha entrevista o xoves. “A UE non respondeu aos movementos do Mercosur como esperabamos”, apuntou.
O Mercosur solicitara un período de transición de 15 anos para a importación de vehículos e repostos europeos, en comparación cos 10 anos orixinalmente propostos, para amortecer o impacto na súa industria. A cambio, a UE puxo sobre a mesa unha cota tan elevada para as importacións procedentes de Europa durante a transición que “anula practicamente” o seu efecto, dixo.
A resistencia da UE ao libre acceso dalgunhas exportacións de alimentos do Mercosur segue sendo un obstáculo chave para completar o acordo, longamente atrasado, que vén negociando desde 1995.
Nunes dixo que non vía ningunha posibilidade de alterar a cota ofrecida pola Comisión da UE para as importacións de carne de vacún do Mercosur de 99.000 toneladas ao ano, que é inferior á oferta europea realizada en 2004. Pero o Mercosur insiste en que ese cupo quede libre de aranceis.
O mesmo ocorre co azucre do Mercosur, que terá unha cota de 150.000 toneladas ao ano, pero debe pagar un arancel de 98 euros por tonelada, o que dificilmente lle permitiría rivalizar no competitivo mercado azucreiro europeo, dixo Nunes. “Se nos ofrecen unha cota, debería ser unha cota real libre de aranceis, non unha cota ficticia”, sinalou.
Nunes agregou que o grupo Mercosur de Arxentina, Brasil, Paraguai e Uruguai, o cuarto bloque comercial máis grande do mundo, ofrece á UE un gran mercado de consumidores de clase media desexosos de comprar produtos europeos.
Desde que se conxelaron as negociacións comerciais con Estados Unidos tras a vitoria de Donald Trump nas eleccións presidenciais de 2016, a UE pechou acordos comerciais con Xapón e México, e Mercosur é o seguinte na súa lista.
En termos de redución arancelaria, podería ser o acordo comercial máis lucrativo do bloque até a data, cun aforro potencial tres veces maior que o dos acordos con Canadá e Xapón xuntos.
Nunes sostivo que o Brexit non tería ningún impacto no acordo UE-Mercosur, salvo que serviría como base para unha futura negociación con Gran Bretaña. “Boris Johnson díxome cando era ministro que o acordo da UE sería o ‘estándar mínimo’ para un acordo Mercosur-Inglaterra”, sentenciou Nunes.
Fonte: Euractiv