ALEJANDRO LÓPEZ DE MIGUEL
Os sindicatos UGT e CCOO convocaron unha protesta contra o TTIP e o CETA ante o edificio da Comisión Europea en Madrid/EFE
A corte de Luxemburgo sentencia que o Executivo comunitario infrinxiu o Tratado da UE. En setembro de 2014, a Comisión Europea denegou o rexistro dunha iniciativa contra estes polémicos tratados comerciais, e hoxe os seus impulsores xa recolleron máis de tres millóns e medio de firmas en rexeitamento ao TTIP e ao CETA
Bruxelas recibiu este mércores un novo pau por blindar os tratados de libre comercio TTIP e CETA, defendidos contra vento e marea polo Executivo comunitario, impermeable ás críticas e as advertencias sobre os seus riscos. A Sala Primeira do Tribunal Xeral da UE emitiu hoxe unha sentenza que tumba a decisión da Comisión Europea de non admitir o rexistro da Iniciativa Cidadá Europea Stop TTIP/ CETA contra estes polémicos acordos comerciais, exposta en 2014.
“A proposta é expresión da participación efectiva dos cidadáns da Unión na vida democrática desta”, di a sentenza
A institución, integrada no Tribunal de Xustiza da UE, replica a Bruxelas que “lonxe de supor unha inxerencia no desenvolvemento dun procedemento lexislativo en curso -como argumentaba a Comisión-, a proposta é expresión da participación efectiva dos cidadáns da Unión na vida democrática desta”, e non compromete o “equilibrio institucional que propugnan os tratados”.
Por contra, o Tribunal de Luxemburgo conclúe que coa súa negativa o Executivo comunitario ten infrinxido varios artigos do Tratado da UE, e condena á Comisión a correr co pago das súas costas e as dos demandantes. Tamén tumba o argumento fundamental de Bruxelas para bloquear esta iniciativa, presentada por centos de organizacións políticas, sindicais e sociais en setembro de 2014.
Entón a Comisión afirmou que non podían aceptar unha iniciativa sobre un tratado que aínda se estaba negociando, e hoxe o Tribunal rexeita esta interpretación: “Sería contraditorio que unha ICE (Iniciativa Cidadá Europea) non puidese ter por obxecto impedir a celebración dun tratado que está a ser negociado”. “Nada xustifica, neste último suposto, que se obrigue aos autores dunha proposta de ICE a esperar á celebración dun acordo para poder impugnar a continuación unicamente a conveniencia deste”.
A normativa que regula esta figura participativa estabelece que para a súa presentación é necesario contar coas firmas de polo menos un millón de cidadáns da UE, procedentes de polo menos un cuarto dos Estados membro. Si o procedemento é aceptado por Bruxelas, pódese solicitar unha audiencia pública no Parlamento Europeo sobre esta materia.
“A negativa de Bruxelas foi arbitraria e ilegal”
Tom Kucharz, membro de Ecoloxistas en Acción, entre as impulsoras da iniciativa, e portavoz da Campaña estatal Non ao TTIP, CETA e TiSA, tacha de “arbitraria” e “ilegal” a decisión de Bruxelas, e celebra a sentenza do Tribunal Xeral.
“Non estaban dispostos a escoitar as voces da cidadanía, que leva manifestando durante anos contra as súas políticas neoliberais, tales como os tratados de comercio e investimento TTIP e CETA. Saudamos a decisión de hoxe, xa que honra a loita social de miles de activistas nos países da UE”, sinala.
Kucharz lembra que xa solicitaron máis de 3,5 millóns de rúbricas contra estes acordos, e insiste en que os asinantes “merecen unha audiencia no Parlamento Europeo”, como permite este tipo de iniciativa -cando é aceptada-.
Por outra banda, o portavoz da Campaña lembra que a ratificación do CETA xa está en trámite parlamentario no Congreso dos Deputados, e pide ás formacións políticas que o apoian -entre elas PP, PSOE e Cidadáns- que “reflexionen”. “Esperamos que esta decisión faga reflexionar aos grupos parlamentarios que tentan impedir calquera control parlamentario e debate público sobre as consecuencias das políticas comerciais”, resolven.
Podemos cre que Bruxelas deberá aceptala
Pola súa banda, fontes de Podemos na Eurocámara interpretan que esta sentenza supón que a obriga da Comisión de admitir a trámite a iniciativa”. “Deberá por tanto rexistrala, recibir a todos os organizadores a un nivel adecuado para que poidan explicar en detalle as cuestións que expón ICE.”
Engaden que tras examinar o texto, nun prazo de tres meses, a Comisión “deberá emitir nunha comunicación as súas conclusións finais de carácter xurídico e político sobre a mesma, as medidas que no seu caso se propoña adoptar e as razóns para actuar así ou para non facelo”.
Do mesmo xeito, consideran que os organizadores terán a posibilidade de presentar a iniciativa cidadá nunha audiencia pública, “preferiblemente no Parlamento Europeo”, o cal xa supón unha primeira vitoria.
Fonte: Público.es